သရုပ်ဆောင်ရာမှာသာမက သီချင်းဆို၊ အသံတုပြုလုပ်ရာမှာလည်း ကျွမ်းကျင်တဲ့ နေတိုးကတော့ တခေတ်တခါက နာမည်ကြီးခဲ့သော ဝင်းဦးရဲ့ သီချင်းတပုဒ်ဖြစ်တဲ့ “မမမိုး” သီချင်းကို အသံတုပြုလုပ်ကာ သရုပ်ဆောင် သီဆိုခဲ့ပါတယ်။
“ဒီဗီဒီယိုလေးကို ဖန်တီးခြင်းဟာ ပရိသတ်များ ကြည့်မိတဲ့ အချိန်တိုလေးအတွင်းမှာ စိတ်အပန်းဖြေပြုံးရွှင်စေရန် ရည်ရွယ်ပြီး ကျနော်တို့အားလုံးရဲ့ ရင်ထဲမှာ အမြဲရှိနေသော အနုပညာရှင်များစွာထဲမှ တချိန်တခါက ရုပ်ရှင်ကို ဆန်းသစ်အောင် ဖန်တီးနိုင်ခဲ့သော အနုပညာရှင်ကြီးအား လေးစားတန်ဖိုးထားသော စိတ်ဖြင့်သာ ရိုက်ကူးဖန်တီးထားခြင်း ဖြစ်ပါတယ်ခင်ဗျာ” လို့ နေတိုးက ပြောပါတယ်။
အဆိုပါ ဗီဒီယိုဖိုင်ကိုတော့ ကိုယ်တိုင် ရိုက်ကူးခဲ့တာဖြစ်ပြီး နေတိုးနဲ့ ဝင်းဦး တွေ့ဆုံတဲ့ နှစ်ကိုယ်ခွဲ ပုံစံနဲ့အတူ ဝင်းဦးရဲ့ “မမမိုး” သီချင်းနဲ့ သရုပ်ဆောင်ပြခဲ့တာ ဖြစ်ပါတယ်။
“ဗီဒီယိုမှာ ကိုယ်တိုင်ရိုက် Home Made Video အမျိုးအစားဖြစ်ပြီး သီဆိုထားသော “မမမိုး” သီချင်းမှာ တေးရေး အလင်္ကာကျော်စွာ ရွှေပြည်အေး ရေးသားထားတာဖြစ်ပြီး မူရင်းအဆိုရှင် ဦးဝင်းဦးရဲ့အသံကို အတုလုပ်ပြီး ပြန်တီးပြန်ဆိုထားခြင်း ဖြစ်ပါတယ်။ ပရိသတ်များအားလုံး ကျန်းမာပျော်ရွှင်သော ဘဝကို ပိုင်ဆိုင်ကြပါစေ ခင်ဗျာ။ သင်ဆရာ မြင်ဆရာများအား ထာဝရ ဦးညွှတ်လျက်ပါ” လို့ နေတိုးက ပြောပါတယ်။
လာမယ့် အောက်တိုဘာ ၁၃ ရက်နေ့မှာဆိုရင်လည်း မြန်မာ့ရုပ်ရှင်နှစ် ၁၀၀ ပြည့်တော့မှာဖြစ်တဲ့အတွက် ယခုအချိန်အခါမျိုးမှာ ပွဲလမ်းသဘင်များ ပြုလုပ်ဖို့ မဖြစ်နိုင်သေးတာကြောင့် အွန်လိုင်းပေါ်မှတဆင့် ဖျော်ဖြေမှုများသာ ပြုလုပ်နေရပြီး ဒီလိုဖျော်ဖြေမှုများကိုလည်း ကျေနပ်ပေးစေလိုတယ်လို့ ဆိုပါတယ်။
“ကျနော် ဖြတ်သန်းခဲ့ရတဲ့ နှစ် ၂၀ အတွင်း လာမယ့် အောက်တိုဘာ ၁၃ ရက်နေ့ဆိုရင် မြန်မာ့ရုပ်ရှင်ဟာ နှစ် ၁၀၀ ပြည့်တော့မှာပါ။ ဒီလိုအချိန် ဒီကာလမျိုးဟာ အပြင်မှာ ပွဲလမ်းသဘင် ပြုလုပ်ဖို့ဆိုတာ မဖြစ်နိုင်ပါဘူး။ ဒါကြောင့် အွန်လိုင်းပေါ်မှာ နည်းမျိုးစုံနဲ့ ဖျော်ဖြေတင်ဆက်မှုတွေနဲ့သာ လောလောဆယ်ကျေနပ်ပေးစေလိုပါတယ်” လို့ နေတိုးက ပြောပါတယ်။
ဆက်လက်ပြီး “နှစ် ၁၀၀ မှ နောင်နှစ်ပေါင်းများစွာတိုင် ခေတ်မီသော တိုးတက်ပြောင်းလဲမှု များစွာဖြင့် ပရိသတ်တွေကို ဖျော်ဖြေတင်ဆက်မှုတွေ ပေးရင်း မြန်မာ့ရုပ်ရှင် ထာဝရရှင်သန်နိုင်ပါစေလို့ ဆုတောင်းပေးပါတယ်” လို့ ပြောပါတယ်။
သရုပ်ဆောင် အကယ်ဒမီ နေတိုးကတော့ အနုပညာလောကထဲမှာ ဖြတ်သန်းလာတာဟာ အခုဆိုရင် နှစ် ၂၀ ရှိပြီဖြစ်ပြီး ထိပ်တန်းမင်းသား တယောက်အနေနဲ့ ရပ်တည်နေဆဲ ဖြစ်ပါတယ်။