လီဗာပူးအသင်းနဲ့အတူ တောက်ပလာဖို့ ဒီယက်စ် ရင်ဆိုင်ရမယ့် အခက်အခဲ (၂) ရပ်

လီဗာပူး ကင်းထောက်တွေဟာ ကိုလံဘီယာသားကို စစတွေ့တဲ့ အချိန်ကတည်းက သူနဲ့ပတ်သက်ပြီး အလွန်အမင်း ချီးကျူးခဲ့တာဖြစ်ကြောင်း ကလော့ပ်က ဝန်ခံခဲ့ပါတယ်။

လီဗာပူးအသင်းဟာ စိတ်ဓါတ်မာကျောသလို ကြိုးစားပေးလိုစိတ်ရှိတဲ့ ကစားသမားတွေကို ခေါ်ယူလေ့ရှိပေမယ့် ကွင်းထံကလာတဲ့ ဖိအားတွေကို ရင်ဆိုင်ဖို့ဆိုတာက အခြားသူထက်စာရင် သူတို့ ကိုယ်တိုင်ပဲ ကိုင်တွယ်ရမှာဖြစ်တယ်။ ဒီအခြေအနေကို ရင်ဆိုင်နိုင်ရင် ဒီယက်စ်ဟာ ပိုမို ထူးချွန်လာမယ်လို့ ကလော့ပ်က မြင်တယ်။

“ သူ့ကို စတွေ့ခဲ့ကတည်းက သူဟာ စိတ်ဓာတ်ပိုင်းဆိုင်ရာကို ကိုင်တွယ်နိုင်ရင် ထူးခြားတဲ့ အဆင့်အတန်း တစ်ခုမှာ ချက်ချင်း ကစားနိုင်တဲ့ ကစားသမားတစ်ယောက် ဖြစ်လာလိမ့်မယ် ဆိုတာ သိခဲ့ပါတယ်။ ဘာလို့လဲဆိုတော့ ကျွန်တော်တို့က သူ ခံစားရမယ့် ဖိအားကို မျှယူပေးလို့ မရဘူး။ သူကိုယ်တိုင်ပဲ ကိုင်တွယ် ဖြေရှင်းရမှာပါ ” လို့ လီဗာပူးနည်းပြ ယာဂင်ကလော့ပ်က ပြောပြပါတယ်။

အင်္ဂလိပ်စကား မပြောနိုင်သေးတဲ့ ဒီယက်စ်ဟာ ဘာသာစကား အခက်အခဲကြောင့် ပရီးမီးယားလိဂ် ကစားသမား ဘဝမှာ အသားကျဖို့ ကြိုးစားနေရဆဲဆိုတာ ကလော့ပ်က သိထားပေမယ့် သူအထိုင်ကျသွားရင် ဘယ်လောက်တော်တဲ့ တောင်ပံကစားသမားလဲ ဆိုတာ မြင်တွေ့ရဖို့ စိတ်လှုပ်ရှားနေတယ်လို့ ဆိုပါတယ်။

ဒီယက်စ်ဟာ သူနဲ့ ဘာသာစကားတူတဲ့ အသင်းဖော်တွေရဲ့ ကူညီမှုကြောင့် အဆင်ပြေနေပေမယ့် အင်္ဂလိပ်စကား ကောင်းမကောင်း မပြောနိုင်ေးလို့ ဘယ်ခြမ်းမှာဆိုရင် ရိုဘိုနဲ့တောင် ဆက်သွယ်ပြောဆိုနိုင်ခြင်း မရှိသေးပါဘူး။

“ ဒါက ကစားသမား တစ်ယောက်နဲ့တစ်ယောက် မတူပါဘူး။ ဒါပေမယ့် လူးဝစ်ကတော့ ကျွန်တော်နဲ့ ဘာသာစကား ပြဿနာရှိတယ်။ ကျွန်တော်က စပိန်လို မပြောတတ်ဘူး။ သူက အင်္ဂလိပ်လို မပြောနိုင်ဘူး။ ဒါပေမယ့် သူ သင်ယူနေပါတယ်။ ကျွန်တော်လည်း သင်ယူနေတယ်။ ဒါကြောင့် သူ့ အင်္ဂလိပ်စကား ပိုကောင်းလာတဲ့အထိ ကျွန်တော်တို့ စောင့်ရမှာပေါ့။

အဲ့ဒီ့မတိုင်ခင်မှာထိတော့ သူနဲ့ စကားပုံမှန်ပြောနေတဲ့ လူတွေအများကြီး ဒီမှာရှိပါတယ်။ အချိန်တော့ ယူရပါလိမ့်မယ်။ သူက အသင်းသစ်တစ်ခုမှာ ရောက်နေပြီး သူ့အပေါ် လူတွေ ဘာမျှော်လင့်ထားလဲ ဆိုတာ စဉ်းစားနေတာပါ။ ဒါပေမယ့် သူက ဒီမှာ သူ့ပုံစံအတိုင်း နေနေတယ်။ သူကစားနေကျ ပုံစံတွေအတိုင်းပဲ ကစားနေပါတယ် ” လို့ ကလော့ပ်က ပြောဆိုခဲ့တာ ဖြစ်ပါတယ်။