မန်ချက်စတာ ယူနိုက်တက်အသင်းရဲ့ နည်းပြအိုလီဂန်နာဆိုးလ်ရှားကတော့ ချယ်ဆီး အသင်းရဲ့ နည်းပြ သောမတ်စ်တူချယ်ကို တနင်္ဂနွေနေ့ စတမ်းဖို့ဒ်ဘရစ်ဂျ်မှာ ကစားရမယ့် ပွဲစဉ်မတိုင်မီ ချီးကျူးခဲ့ပါတယ်။
ပြီးခဲ့တဲ့လက နည်းပြလမ်းပတ်ရဲ့နေရာမှာ အစားထိုးခံခဲ့ရပြီးနောက် နည်းပြတူချယ်ရဲ့ ချယ်ဆီး အသင်းဟာ နောက်ဆုံး ၈ ပွဲမှာ ၆ ပွဲအနိုင်ရရှိခဲ့ပြီး ပရီးမီးယားလိဂ်မှာ ရှုံးပွဲမရှိသေးပါဘူး။ အသင်းရဲ့ ရလဒ်တွေ တိုးတက်လာတာကြောင့် ချယ်ဆီး အသင်းအနေနဲ့ ထိပ်ဆုံး ၄ သင်းထဲကို ဝင်နိုင်လိမ့်မယ်လို့ ယုံကြည်နေပါတယ်။
ယူနိုက်တက် နည်းပြဆိုးလ်ရှားကတော့ ချယ်ဆီးနဲ့ မရင်ဆိုင်ခင် ပွဲကြို ရှင်းလင်းပွဲမှာ ပြိုင်ဘက် နည်းပြကို အခုလို ချီးကျူးခဲ့တာပါ။
“ရလဒ်တွေ၊ အချက်အလက်တွေ၊ ဂိုးမပေးရရေး စွမ်းဆောင်မှုတွေနဲ့ ဘောလုံးပိုင်ဆိုင်မှုတွေကို ကြည့်ရင်သူတို့ ဘယ်လောက်ထိ တိုးတက်လာလဲ သိနိုင်ပါတယ်။ သူ(တူချယ်) လုပ်နေတာတွေ အရမ်းကောင်းပါတယ်။ ရာသီဝက်ကစပြီး အသင်း တစ်သင်းကို တာဝန်ယူရတာ မလွယ်ပါဘူး၊ ဒါပေမယ့် သူတော်တယ် ၊ ကျွန်တော်တို့ အဲ့ဒါကို တားဆီးနိုင်မယ်လို့ထင်ပါတယ်။ လက်ရှိ ကျွန်တော့်အလုပ်က ပြိုင်ဘက်တွေကို ရပ်တန့် ပစ်ဖို့ပါပဲ ” လို့ ပြောဆိုခဲ့ပါတယ်။
လက်ရှိ ချယ်ဆီး အသင်းဟာ ဝက်စ်ဟမ်းနဲ့ ၂ မှတ် မန်ချက်စတာ ယူနိုက်တက်နဲ့ ၆ မှတ်တို့ ကွာဟနေပါတယ်။ ဒီပိတ်ရက်မှာတော့ ယူနိုက်တက်ကို အိမ်ကွင်းမှာ ယှဉ်ပြိုင်ရမှာ ဖြစ်တာကြောင့် ချယ်ဆီး အသင်းအနေနဲ့ အမှတ်ကွာဟကို လျှော့ဖို့ အခွင့်အရေး ပိုင်ဆိုင်ထားပါတယ်။