France Football ဟာ ဘလွန်းဒီအော ဆုနှင့် Kopa Trophy Award တို့အတွက် ဆန်ကာတင်ကစားသမားစာရင်းကို ကြေညာခဲ့သလို ဘလွန်းဒီအော တစ်နှစ်တာ အကောင်းဆုံးနည်းပြဆုအတွက်လည်း ဆန်ကာတင်စာရင်းကို ကြေညာလာပါတယ်။
တစ်နှစ်တာအကောင်းဆုံးနည်းပြဆုအတွက် ဆန်ကာတင်စာရင်းတွင် ဇာဘီ အလွန်ဆို(လေဗာကူဆင်)၊ ကာလိုအန်ဆယ်လော့တီ (ရီးရဲလ်မက်ဒရစ်)၊ လူးဝစ်ဒီလာဖူအန်တီ(စပိန်)၊ ဂီယန်ပီရိုဂက်စ်ပါရီနီ(အတ္တလန္တာ)၊ ပက်ဂွါဒီယိုလာ(မန်စီးတီး)နှင့် လီယွန်နယ်စကာလိုနီ(အာဂျင်တီးနား)တို့ ပါဝင်လာပါတယ်။
မန်ချက်စတာ စီးတီး အသင်း နည်းပြ ဂွါဒီယိုလာ က သမိုင်းမှာ မရှိသေးဖူးတဲ့ မှတ်တမ်းသစ် အဖြစ် ပြီးခဲ့တဲ့ရာသီက ပရီးမီးယားလိဂ်ဖလား ၄ ကြိမ်ဆက်တိုက် မန်စီးတီးနှင့်အတူ ဆွတ်ခူးနိုင်ခဲ့ပါတယ်။
အလွန်ဆိုမှာ ပြီးခဲ့တဲ့ ရာသီတုန်းက လေဗာကူဆင်အား တစ်ရာသီလုံးရှုံးပွဲမရှိ စံချိန်ဖြင့် ပထမဆုံးဘွန်ဒက်စ်လီဂါဖလားအား ရယူပေးခဲ့သလို ဂျာမန်ပိုကယ်ဖလားလည်း ရယူပေးခဲ့ပါတယ်။ ဒါ့အပြင် သူဟာ လေဗာကူဆင်ကို ယူရိုပါလိဂ်ဖလားဗိုလ်လုပွဲသို့လည်း ပို့ဆောင်ပေးနိုင်ခဲ့ပါတယ်။
ဝါရင့်နည်းပြကာလိုအန်ဆယ်လော့တီမှာ ပြီးခဲ့တဲ့ ရာသီတုန်းက ရီးရဲလ်မက်ဒရစ်ကို လာလီဂါဖလားနှင့် ချန်ပီယံလိဂ်ဖလား ရယူပေးခဲ့သူ ဖြစ်ပါတယ်။ လူးဝစ်ဖူအန်တီမှာလည်း စပိန်ကို ယူအီးအက်ဖ်အေနေးရှင်းလိဂ်အပြင် ယူရို ၂၀၂၄ ဖလား ရယူပေးနိုင်ခဲ့ပါတယ်။
ဒါ့အပြင် ဂက်စ်ပါရီနီမှာလည်း အတ္တလန္တာကို ယူရိုပါလိဂ်ဖလား ရယူပေးခဲ့သလို စကာလိုနီမှာလည်း အာဂျင်တီးနားနှင့်အတူ ကိုပါအမေရိကဖလားချန်ပီယံကာကွယ်နိုင်ခဲ့ပါတယ်။
ယင်းဆုကို အောက်တိုဘာလ ၂၈ ရက်နေ့ Ballon d’Or ဆုပေးပွဲအခမ်းအနားတွင်ပင် ချီးမြှင့်သွားပါမယ်။